(दिनांक ०५ जून, २०२५) आज मराठी एकीकरण समितीच्या शिष्टमंडळाने मिरा भाईंदर महानगरपालिकेचे आयुक्त व प्रशासक भा. प्र. से. राधाविनोद शर्मा यांची भेट घेऊन मराठी भाषा, स्थानिक संस्कृती आणि नागरिकांच्या मूलभूत सुविधांशी संबंधित विविध महत्त्वाच्या विषयांवर चर्चा केली.
या शिष्टमंडळात अध्यक्ष श्री. गोवर्धन देशमुख, कार्याध्यक्ष श्री. प्रदीप सामंत, उपाध्यक्ष श्री. प्रमोद पार्टे, श्री. महेश पवार, तसेच सहकारी श्री. मारुती भट्टगिरी आणि अन्य अनेक मराठी शिलेदार उपस्थित होते. ही भेट संवादातून समाधानाकडे जाणारा मार्ग घडवणारी ठरली.
चर्चेतील प्रमुख मुद्दे:
🟡 १. मराठी भाषा सक्ती आणि प्राधान्य
महापालिकेच्या सर्व विभागांमध्ये मराठीचा अनिवार्य वापर, सूचना फलक, फॉर्म्स, संकेतस्थळे व सेवेची भाषा म्हणून मराठीचा प्रभावी वापर व्हावा, अशी आमची ठाम भूमिका होती.
🟡 २. मराठी माध्यमांच्या शाळांना चालना
शहरातील मराठी शाळांची संख्या व दर्जा वाढविण्याची गरज असून पालकांना त्यांच्या मुलांना मराठीतून शिक्षण देण्याचा आत्मविश्वास निर्माण होण्यासाठी नगरपालिका पातळीवर प्रयत्न होणे आवश्यक आहे.
🟡 ३. सांस्कृतिक कार्यक्रमांसाठी मराठीला प्राधान्य
महानगरपालिकेच्या वतीने आयोजित होणाऱ्या सांस्कृतिक कार्यक्रमांमध्ये स्थानिक कलाकारांना आणि मराठी परंपरेला अग्रक्रम द्यावा.
🟡 ४. स्थानिक नागरिकांसाठी रोजगार संधी
महानगरपालिकेच्या कंत्राटी व कायमस्वरूपी नोकऱ्यांमध्ये स्थानिक मराठी युवक-युवतींना प्राधान्य द्यावे.
आयुक्तांची सकारात्मक भूमिका:
मा. आयुक्त श्री. राधाविनोद शर्मा यांनी सर्व मुद्द्यांवर अत्यंत संयमाने चर्चा केली. मराठीच्या हक्कांबाबतची आमची भूमिका त्यांनी समजून घेतली आणि काही गोष्टी तत्काळ कृतीत आणण्याचे आश्वासन दिले.
पुढील वाटचाल:
मराठी एकीकरण समिती केवळ तात्कालिक चर्चेत अडकणार नाही, तर प्रशासनाच्या प्रत्येक पातळीवर सतत पाठपुरावा, जनजागृती मोहिमा आणि स्थानिक सहभागातून आंदोलनाची दिशा ठरवेल.
आम्ही मागतोय काय?
- मराठी ही केवळ भाषा नव्हे, तर अस्मिता आहे.
- महानगरातील प्रत्येक शाळा, कार्यालय, सार्वजनिक व्यवस्था यामध्ये मराठीचा वापर बंधनकारक करावा.
- मराठी माध्यमातून शिक्षण घेणाऱ्या विद्यार्थ्यांना उच्च दर्जाची शैक्षणिक साधने उपलब्ध करून द्यावीत.
- स्थानिक मराठी तरुणांना रोजगार व प्रतिनिधित्वात संधी मिळाली पाहिजे.
आमचे आवाहन:
मिरा भाईंदरमधील सर्व मराठी बांधवांनी मराठीच्या रक्षणासाठी व प्रोत्साहनासाठी एकत्र यावे.
मराठीसाठी ही लढाई केवळ समितीची नाही, ही प्रत्येक मराठी माणसाची जबाबदारी आहे.
मराठीसाठी एक पाऊल पुढे…
मराठीसाठी एकत्र येऊया!