“मराठी एकीकरण समिती – महाराष्ट्र राज्य (Marathi Ekikaran Samiti – Maharashtra Rajya)” ही महाराष्ट्र राज्यातील मराठी भाषा आणि अस्मितेसाठी लढणारी एक  बिगर राजकीय लोकचळवळ आहे. ही लोकचळवळ मराठी भाषा, मराठी अस्मिता, मराठी माध्यमातील शाळांचे संवर्धन, मराठी माध्यमातील शिक्षण, मराठी रोजगार आणि व्यवसाय यांसाठी कार्यरत आहे. 

          मराठी एकीकरण समिती (महाराष्ट्र राज्य) या लोकचळवळ संघटनेची स्थापना ६ जून २०१५ या दिवशी झाली आणि तिथपासून आजपर्यंत ही बिगर राजकीय लोकचळवळ संघटना महाराष्ट्रात मराठीच्या न्याय्य हक्कांसाठी कार्यरत आहे. “एकच ध्येय, एकच ध्यास, मराठी भाषा, मराठी शाळा, राज्य संस्कृतीचे संवर्धन व विकास” हे मराठी एकीकरण समिती (महाराष्ट्र राज्य) या संघटनेचे ब्रीदवाक्य आहे. संघटनेचे मूळ ध्येय मराठी माणसांना एकत्र आणून उद्योग क्षेत्रात मराठी माणसाची मोठी फळी उभारावी हे आहे. राज्यात होणाऱ्या मराठी भाषेच्या गळचेपी विरोधात आवाज उचलण्यासाठी कायदेशीर लढा देणे, आंदोलने करणे, मराठी हा विषय राजकारणापुरता नसून राजकारणाचा वापर मराठी संवर्धनसाठी केला पाहिजे हे संघटनेचे धोरण आहे. ही संघटना सर्व राजकीय पक्षांना, राज्यातील जनतेला मराठी भाषेविषयी, मराठी शाळांविषयी जागरूक करण्याचे काम करत आहे. या महाराष्ट्रात धर्म, जात, राजकीय पक्ष बाजूला ठेवून मराठीसाठी कार्य करणारी ही बिगर राजकीय संघटना आहे. मराठी एकीकरण समिती संघटनेची सध्या २२,०००हून जास्त सभासद संपूर्ण भारतीय संघराज्यात आहेत आणि विविध पातळीवर मराठीच्या न्याय्य हक्कांसाठी ते कार्यरत आहेत. संघटनेचे मार्गदर्शक माजी आय एफ एस अधिकारी, माजी पोलीस अधिकारी, काही कायदेतज्ज्ञ तसेच सामाजिक क्षेत्रातील काही मोठी नेते मंडळी आहेत.